ХОНГОР СУМААС АЛДАГДСАН 9600 ГА ГАЗРЫН АСУУДЛЫГ АХИН ХЯНУУЛНА

 2016 онд Сэлэнгэ аймгийн Ерөө сум манай Дархан - Уул аймгийн Хонгор сумын 9600 гаруй га газрыг хууль бусаар дээрэмдээд авчихсан байдаг.

Энэ асуудлыг би УИХ-ын чуулган дээр асуудал болгон тавьж байсан. Геодези, Зураг зүйн тухай хуулийн шинэчилсэн найруулгын хүрээнд ахин албан ёсоор асуудал болгож БХБ сайдад тавилаа.

 Анх 1965 онд Сэлэнгэ аймагт Дархан, Хонгор сумыг газар нутагтай нь байгуулах тухай Ардын Их Хурлын Тэргүүлэгчдийн Зарлиг гарч манай ДАРХАН-УУЛ-ын газар баталгаажиж байсан юм. Сүүлд 1994 онд УИХ-ын тогтоолоор энэ газрыг яг байгаагаар нь баталгаажуулсан байдаг.

 Гэтэл Барилга хот байгуулалтын яамны Геодези зураг зүйн газрын албаны нөхдүүд 22 жилийн дараа гэнэт "Андуурсан" гэх шалтгаанаар өөр газар цэг хатгаж байгаад 9600 га газрыг хууль бусаар дээрэмдээд авчихсан.

 Ер нь газар нутгийн хилийн асуудал нэг агентлаг, яамны асуудал биш, УИХ-ын онцгой бүрэн эрхэд хамаарах асуудал. Энэ үйлдэл бол үндсэн хууль зөрчсөн үйлдэл болсон.

 Цэг нь өөрчлөгдөж болно, гэхдээ Дархан- Уул аймгийн нийт талбай, газрын хэмжээ багасах ёсгүй юм.

Төрөлх нутгийнхаа хууль бусаар алдсан газрыг буцааж авахын тулд явна. Энэ газар эзэнтэй, эзэд нь алдсан газраа буцааж авна!